कुर्ला येथे बेस्ट बसच्या भीषण अपघातात जखमी झालेल्या आणखी एकाचा आज शीव रुग्णालयात उपचारादरम्यान मृत्यू झाला. त्यामुळे या अपघातातील मृतांची संख्या आता नऊ झाली आहे. मेहताब शेख (22) असे या मृत तरुणाचे नाव आहे. कुर्ला पश्चिम येथे सोमवार, 9 डिसेंबरला रात्री 9.30 च्या सुमाराला भरधाव वेगात असलेल्या बेस्ट बसने अनेक पादचारी व वाहनांना धडक दिली. या अपघातामध्ये 49 जण जखमी झाले, तर सात जणांचा मृत्यू झाला होता. त्यानंतर उपचारादरम्यान आठवडाभरात दोघा जखमींचा मृत्यू झाला होता. शीव रुग्णालयात उपचार घेत असलेल्या मेहताब शेख याचा आज मृत्यू झाला. त्यामुळे कुर्ला बेस्ट अपघातातील मृतांची संख्या नऊवर पोहोचली आहे. या दुर्घटनेतील जखमींवर कुर्ला येथील हबीब या खासगी रुग्णालयात तर महापालिकेच्या भाभा व शीव रुग्णालयात उपचार सुरू आहेत.
