क्रांतिकारी आदिवासी नेते बिरसा मुंडा यांचे पणतू मंगल सिंग मुंडा यांचे गुरुवारी रात्री साडेबारा वाजण्याच्या सुमारास निधन झाले. एका रस्ते अपघातात गंभीर जखमी झाल्यानंतर गेल्या 3 दिवसांपासून त्यांच्यावर रांचीच्या रीम्स या सर्वात मोठय़ा रुग्णालयात उपचार सुरु होते. मुख्यमंत्री हेमंत सोरेन यांनी रीम्स येथे पोहोचून मंगल मुंडा यांच्या पार्थिवावर पुष्पहार अर्पण करून त्यांना श्रद्धांजली वाहिली. दरम्यान, रिम्स रुग्णालयाच्या व्यवस्थापनाने उपचारात निष्काळजीपणा केल्यामुळे मुंडा यांचा जीव गेल्याचा आरोप त्यांच्या कुटुंबीयांनी केला.
