वांद्रे-कुर्ला संकुलातील एमएमआरडीएच्या मैदानावर उद्या शनिवारी ‘फिडिंग इंडिया कॉन्सर्ट’ या कार्यक्रमाचे आयोजन करण्यात आले असून त्याकरिता आंतरराष्ट्रीय स्तरावरील नामांकित गायक उपस्थित राहणार आहेत. या कार्यक्रमासाठी मोठय़ा संख्येने नागरिक येणार असल्याने होणारी गर्दी लक्षात घेता या ठिकाणच्या वाहतुकीत बदल करण्यात येणार आहे.
वांद्रे-कुर्ला संकुलातील एशियन हार्ट इस्पितळाजवळील एमएमआरडीएच्या मैदानावर ‘फिडिंग इंडिया कॉन्सर्ट’ हा लाईव्ह कॉन्सर्टचा कार्यक्रम होणार आहे. या कार्यक्रमाचा आनंद लुटण्यासाठी मोठय़ा संख्येने चाहते तेथे येणार आहेत. परिणामी त्या परिसरात मोठी गर्दी उसळणार असल्याने वाहतुकीचा खोळंबा होऊ नये, अन्य नागरिकांना त्याचा त्रास होऊ नये याकरिता वाहतूक पोलिसांनी या ठिकाणच्या वाहतुकीत बदल केला आहे. बरेच मार्ग वाहतुकीसाठी बंद केले असून त्याऐवजी पर्यायी मार्गाचा अवलंब करण्याचे आवाहन मुंबई वाहतूक पोलिसांनी केले आहे. शनिवारी दुपारी एक ते रात्री 12 वाजेपर्यंत वाहतूक व्यवस्थेत बदल राहणार असल्याचे वाहतूक पोलिसांकडून स्पष्ट करण्यात आले आहे.
