हिंदुस्थानी संघ पाकिस्तानात खेळायला नकार देत आहे. त्यामुळे पाकिस्तानी संघही भविष्यात कोणत्याही स्पर्धेसाठी हिंदुस्थानात क्रिकेट खेळणार नसल्याचे पीसीबीचे अध्यक्ष मोहसीन नक्वी यांनी धमकावले आहे. पीसीबीच्या या धमकीमुळे हिंदुस्थानात होणाऱ्या आगामी आयसीसी स्पर्धांमध्ये पाकिस्तानही खेळणार नसल्याचे त्यांनी आत्ताच कळवले आहे.
चॅम्पियन्स ट्रॉफीच्या आयोजनाबाबत अद्याप अनिश्चितता असल्यामुळे चिंतीत असलेले नकवी म्हणाले, जर पाकिस्तानी संघ हिंदुस्थानात जाऊन खेळत असेल आणि हिंदुस्थानी सरकार मात्र आपल्या क्रिकेट संघाला पाकिस्तानात पाठवण्यात तयार नाहीय. आम्ही अशी विषमता कदापि खपवून घेणार नाही. शुक्रवारी आयसीसीच्या बैठकीत क्रिकेटच्या हिताचा योग्य निर्णय घेतला जाईल आणि आम्ही ते मान्य करू, असे आश्वासन नक्वी यांनी दिले आहे.
