राज्य मार्ग परिवहन महामंडळाच्या बसने रिक्षाला जोरदार धडक दिल्याने सात जणांचा जागीच मृत्यू झाला तर अनेक जण यात जखमी झाले. आंध्र प्रदेशातील अनंतपूर जिल्ह्यात घटना घडली. जखमींना उपचारासाठी नजीकच्या रुग्णालयात दाखल करण्यात आले आहे. डी नागम्मा, रमांजिनम्मा, बालापेद्दय्या आणि बी नगम्मा अशी चौघा मृतांची नावे आहेत तर तिघांची ओळख अद्याप पटू शकली नाही.
मिळालेल्या माहितीनुसार, मयत आणि जखमी लोक पुतलूर मंडलातील एलुटला गावातील रहिवासी आहेत. सर्व जण रोजंदारीवर काम करणारे कामगार आहेत. थिम्ममपेटाजवळील केळीच्या मळ्यात रोजंदारीवर सर्वजण काम करतात.
नेहमीप्रमाणे कामावरून परतत असताना गर्लादिन मंडलातील तलागासीपल्ली क्रॉसजवळ त्यांच्या रिक्षाला बसने धडक दिल्याने हा अपघात झाला. रिक्षात एकूण 13 जण प्रवास करत होते.
