गोव्याच्या समुद्रात मासेमारी करणाऱ्या जहाजाशी नौदलाच्या जहाजाची टक्कर झाली. या जहाजावर 13 क्रू मेंबर्स होते. त्यापैकी 11 जणांना वाचवण्यात यश आले आहे. तर दोन क्रू मेंबर्स अद्याप बेपत्ता असल्याची माहिती आहे. गोव्याच्या उत्तर-पश्चिमेला सुमारे 70 नॉटिकल मैल अंतरावर गुरूवारी ही घटना घडली.
मार्थोमा या भारतीय मासेमारी जहाजाशी नौदल युनिटची टक्कर झाली. त्यानंतर नौदलाची टीम बचाव कार्यासाठी तैनात करण्यात आली होती. शोधासाठी सहा जहाजे आणि विमानेही तैनात करण्यात आली आहेत.
मासेमारी जहाज आणि नौदल युनिटमध्ये टक्कर कशी झाली? हे अद्याप कळू शकले नाही. बचावकार्य संपल्यानंतर याबाबत तपास करण्याची अपेक्षा आहे. दरम्यान, नौदलाने क्रू मेंबर्सचा शोध घेण्याची वचनबद्धता व्यक्त केली आहे. नौदलाची अनेक पथके अपघातस्थळी बेपत्ता क्रू मेंबर्सचा शोध सुरू आहे.
