अजित पवार हे जातीयवादी असून त्यांनी नेहमी OBC, ST, NT समाजाच्या बजेटमध्ये कपात केली, असा आरोप राष्ट्रवादी काँग्रेस शरदचंद्र पवार पक्षाचे नेते जितेंद्र आव्हाड यांनी केला आहे. तसेच त्यांनी या समाजासाठी निधी दिला नाही, अशी टीकाही त्यांनी केली आहे. आव्हाड यांच्या प्रचारासाठी रविवारी कन्हैयाकुमार येत आहेत, त्याबाबतही त्यांनी मत व्यक्त केले.
ही विचारधारेची लढाई आहे. नरेंद्र मोदी, अमित शहा, योगी आदित्यनाथ, देवेंद्र फडणवीस ज्याप्रमाणे द्वेष पसरवत आहेत, हा द्वेष देशाला धोकादायक आहे. याविरोधात लढणार एक फळी देशात आहे, त्यात कन्हैयाकुमार यांचे नाव आहे. तसेच ते माझे चळवळीतील सहकारी आहेत. त्यामुळे आपल्या प्रचारासाठी ते येत आहेत.विचारधारेविरोधातील आणि देशात द्वेष पसरवणाऱ्याविरोधातील लढाईसाठी आम्ही सर्व एकत्र आहोत, असेही त्यांनी स्पष्ट केले.
प्रतिभाताई पवार यांनाही आता प्रचारासाठी बाहेर पडावे लागत आहे, अशी टीका अजित पवार यांनी केली होती. त्यालाही आव्हाड यांनी जबरदस्त प्रत्युत्तर दिले आहे. त्यांच्यावर ही वेळ कोणी आणली, याचा विचार अजित पवार यांनी करण्याची गरज आहे. अजित पवार यांनी जे केले, त्यामुळे शरद पवार यांच्या डोळ्यात अश्रू आले. त्यांची नाचक्की होईल, असं वर्तन त्यांनी का केलं? त्या माणसाला हृदय नाही का, भावभावना नाहीत काय? या घटनेने त्या माऊलीलाही वाईट वाटले असेल. ज्या माऊलीनं त्यांना लहानाचे मोठे केले, साहेबांकडे आग्रह धरून त्यांना अनेक गोष्टी मिळवून दिल्या. त्यांनी त्या माऊलीवरच ही वेळ आणली आहे, असा घणाघातही आव्हाड यांनी अजित पवार यांच्यावर केला.
