जम्मू-काश्मीरच्या किश्तवाडमध्ये ग्राम संरक्षण गटाच्या दोन सदस्यांचे दहशतवाद्यांनी अपहरण करून त्यांची हत्या केल्याची घटना गुरूवारी सायंकाळी घडली. जैश-ए मोहम्मद या दहशतवादी संघटनेच्या काश्मीर टायगर्स या गटाने या हल्ल्याची जबाबदारी स्वीकारली. हत्या केल्यानंतर पीडितांच्या मृतदेहाच्या डोळ्यांवर पट्टी बांधून त्यांचे फोटोही शेअर केले.
नजीर अहमद आणि कुलदीप कुमार अशी हत्या झालेल्या दोघा सदस्यांची नावे असून ते ओहली कुंटवारा गावचे रहिवासी आहेत. दोघेही गुरे चारण्यासाठी जंगलात गेले असताना दहशतवाद्यांनी त्यांचे अपहरण केले. अद्याप दोघांचे मृतदेह सापडलेले नाहीत. लेफ्टनंट गव्हर्नर मनोज सिन्हा, मुख्यमंत्री ओमर अब्दुल्ला आणि इतरांनी या हत्येचा निषेध केला आहे.
मुख्यमंत्री ओमर अब्दुल्ला आणि पक्षाचे अध्यक्ष फारुख अब्दुल्ला यांनी देखील आपल्या एक्स अकाऊंटवर पोस्ट करत या हत्येचा निषेध केला आहे. जम्मू-काश्मीरमध्ये शांतता प्रस्थापित करण्यात अशा प्रकारच्या हिंसक घटना अडथळा ठरत असल्याचे त्यांनी पोस्टमध्ये म्हटले आहे.
