मोखाडा तालुक्यातील दुधगाव येथील 13 वर्षांच्या अल्पवयीन मुलीला लग्नाचे आमिष दाखवून अत्याचार केल्याची घटना समोर आली आहे. या प्रकरणी मोखाडा पोलिसांनी हरेश ठोंबरे (24) या नराधमाला अटक केली. त्याला भिवंडी न्यायालयाने तीन दिवसांची पोलीस कोठडी सुनावली आहे.
आरोपीने पीडितेला आमले गावानजीकच्या जंगलात नेऊन धमकी देत शारीरिक संबंध ठेवल्याचा आरोप पीडितेच्या आईने केला आहे. तिच्या तक्रारीवरून पोलिसांनी हरेशविरोधात पोक्सो कायद्यान्वये अल्पवयीन मुलीवर लैंगिक अत्याचाराचा गुन्हा नोंदवला आहे. तालुक्यात 27 ऑक्टोबरला आठ वर्षांच्या बालिकेवर अत्याचार करून हत्या केल्याची घटना घडली होती. त्यापाठोपाठ चारच दिवसांत दुधगाव येथे दुसरी घटना घडली.
