हिंदुस्थानचा स्फोटक फलंदाज विराट कोहलीच्या 36 व्या जन्मदिनानिमित्त क्रिकेट आणि क्रीडा विश्वातून त्याच्यावर शुभेच्छांचा ‘विराट’ वर्षाव झाला. ‘किंग कोहली, तुझ्या दमदार पुनरागमनाची अवघे विश्व वाट बघतेय,’ अशा शब्दांत विराटला शुभेच्छा देण्यात हिंदुस्थानी क्रिकेट विश्वातील दिग्गज सरसावले होते.
विराटच्या वाढदिवसाचे औचित्य साधत अवघे क्रीडा विश्व सोशल मीडियावर अवतरले होते. अनेकांनी सोशल मीडियावर पोस्ट शेअर करत हिंदुस्थानातील दिग्गज क्रिकेटपटूंसह जगभरातील क्रिकेट खेळाडू आणि इतर खेळांतील दिग्गजांनी विराटला पुढील वाटचालीसाठी शुभेच्छा दिल्या.
हिंदुस्थानचा ‘सिक्सर किंग’ युवराज सिंगने विराटला अनोख्या शब्दांत शुभेच्छा दिल्या आहेत. युवराजने विराटसोबतचा आठवणींचा व्हिडीओ पोस्ट करत त्याला शुभेच्छा दिल्या आहेत. ‘विराट, तुला वाढदिवसाच्या खूप खूप शुभेच्छा. संपूर्ण जग तुझ्या क्रिकेटमधील पुनरागमनाची वाट पाहत आहे. तू याआधी खूप काही मिळवलं आहेस आणि मला खात्री आहे की या पुढेही मिळवशील,’ अशी पोस्ट शेअर करत युवराजने विराटला खुप सारे प्रेम दिले आहे. माजी फिरकावीर हरभजन सिंगनेही विराटला वाढदिवसाच्या शुभेच्छा देताना ‘वाढदिवसाच्या शुभेच्छा विराट कोहली, आश्वासक युवा प्रतिभेपासून ते आमच्या काळातील महान खेळाडूंपैकी एक असा तुझा प्रवास अभूतपूर्व होता. तू सर्वच महत्त्वाकांक्षी क्रिकेटपटूंना मोठी स्वप्ने पाहण्यासाठी, कठोर परिश्रम करण्यासाठी आणि स्वतःवर विश्वास ठेवण्यासाठी प्रेरित केले आहेस. तुला उज्ज्वल आणि आनंदी जीवनासाठी शुभेच्छा,’ असे नमूद केले.
हिंदुस्थानचे माजी मुख्य प्रशिक्षक आणि माजी कसोटीपटू रवी शास्त्राr यांनीही विराटला शुभेच्छा दिल्या. ‘वाढदिवसाच्या शुभेच्छा चॅम्पियन. लवकरच तुझा चांगला काळ सुरू होईल,’ असे ते आवर्जून म्हणाले.
