स्पेनमधील पूरग्रस्त व्हॅलेन्सिया भागात भेट देण्यासाठी गेलेल्या राजा फिलिप आणि त्यांची पत्नी राणी लेटेजिया यांच्यावर संतप्त लोकांनी चिखलफेक केली. लोकांनी किलर आणि शेम ऑन यू अशा घोषणाही दिल्या, असा दावा बीबीसी वृत्तवाहिनीच्या वृत्तात करण्यात आला आहे. यावेळी राजा फिलिपसोबत स्पेनचे पंतप्रधान पेड्रो सांचेझही उपस्थित होते. पूर रोखण्यासाठी या नेत्यांनी पूर्वीपासूनच का काही केले नाही, असा सवाल यावेळी लोकांनी केला. दरम्यान, जमावाला रोखण्यासाठी पोलिसांनी हस्तक्षेप केला. चिखलफेक हल्ल्यात तैनात असलेले दोन सुरक्षा रक्षक जखमी झाले. या घटनेनंतर स्पॅनिश राजा आणि पंतप्रधानांनी दौरा अपूर्ण सोडून राजधानी गाठली. स्पेनमध्ये इतिहासातील सर्वात मोठा महापूर आला असून आतापर्यंत 217 लोकांचा मृत्यू झाला आहे.
