>> बबन लिहिणार
168 चांदिवली विधानसभा मतदारसंघात महाविकास आघाडीकडून काँग्रेसचे उमेदवार मो. आरिफ (नसीम) खान हे निवडणुकीच्या मैदानात उतरले आहेत, तर शिंदे गटाकडून दिलीप लांडे यांना उमेदवारी देण्यात आली आहे. या ठिकाणी राज ठाकरे यांच्या मनसेनेही निवडणुकीच्या मैदानात उडी घेतली आहे, परंतु मनसेने मराठी उमेदवाराला डावलून थेट अमराठी असलेल्या महेंद्र भानुशाली यांना उमेदवारी दिली आहे. मनसेच्या या निर्णयावर अनेकांनी आश्चर्य व्यक्त केले आहे. त्यामुळे चांदिवलीत महाविकास आघाडी विरुद्ध महायुती असा थेट सामना रंगणार आहे. चांदिवली मतदारसंघात 2014 मध्ये नसीम खान हे 73 हजार 141 मते मिळवून विजयी झाले होते. त्यांनी संतोष सिंह यांचा 29 हजार 469 मतांनी पराभव केला होता, तर 2019 च्या विधानसभा निवडणुकीत नसीम खान यांचा निसटता पराभव झाला होता. शिवसेनेच्या दिलीप लांडे यांनी त्यांचा अवघ्या 409 मतांनी पराभव केला होता, परंतु त्या वेळी शिवसेना अखंड होती. त्यामुळे दिलीप लांडे यांचा विजय झाला होता, परंतु आता परिस्थिती उलट आहे. नसीम खान यांना महाविकास आघाडीचा भक्कम पाठिंबा आहे. त्यामुळे नसीम खान यांच्या विजयाचे पारडे जड मानले जात आहे. चांदिवलीत गेल्या पाच वर्षांत विकासाच्या नावाने नुसती बोंब मारली गेली आहे. खरं म्हणजे लांडे यांना या मतदारसंघात विकास करण्यात सपशेल अपयश आले आहे. त्यांना कोणत्याही मोठय़ा योजना मतदारसंघात आणता आल्या नाहीत. चांदिवलीत वाहतुकीची समस्या, पाणीटंचाईची समस्या, नागरी सुविधेचा अभाव, रखडलेले एसआरए प्रकल्प, अवैध जागेवर कब्जा, रस्त्यांवर अनधिकृत फेरीवाले यांसारख्या समस्या सोडवण्यात लांडे यांना अपयश आले आहे.
नसीम खान विरुद्ध दिलीप लांडे यांच्यात थेट लढत
मतदारसंघात समस्याच समस्या
चांदिवली मतदारसंघात भरमसाट समस्या आहेत. या ठिकाणी मोठय़ा प्रमाणात झोपडपट्टी पुनर्वसन योजना (एसआरए) प्रकल्प रखडले आहेत. त्यामुळे शेकडो नागरिक पुनर्वसनाच्या प्रतीक्षेत आहेत. मतदारसंघात मोठय़ा प्रमाणात पाणीटंचाईची समस्या भेडसावत आहे. पार्ंकगची समस्या वर्षानुवर्षे धूळ खात पडलेली आहे. या प्रमुख समस्यांकडे आमदार म्हणून दिलीप लांडे यांनी सपशेल दुर्लक्ष केल्याचे बोलले जात आहे.
गद्दारीचा शिक्का
दिलीप लांडे यांच्यावर गद्दारीचा शिक्का बसलेला आहे. त्यामुळे त्यांना ही निवडणूक जड जाणार आहे. लांडे यांनी गद्दारी करत ते शिवसेना सोडून मनसेत गेले. मनसेतून पुन्हा शिवसेनेत आले. एकनाथ शिंदे यांनी ज्या वेळी गद्दारी केली, त्या वेळी दिलीप लांडे यांनी पुन्हा एकदा गद्दारी करीत शिंदेंसोबत गुवाहाटीला पोहोचले. त्यामुळे दिलीप लांडे यांच्यावर मतदारसंघातील मतदार नाराज आहेत. त्याचा फटका त्यांना या निवडणुकीत बसण्याची शक्यता आहे.
