कल्याण पश्चिम विधानसभा मतदारसंघात महाविकास आघाडीचे शिवसेना (उद्धव बाळासाहेब ठाकरे) पक्षाचे उमेदवार सचिन बासरे यांनी मोठे शक्तिप्रदर्शन करत उमेदवारी अर्ज दाखल केला. अर्ज दाखल केल्यानंतर महाविकास आघाडीच्या घटक पक्षांच्या कार्यकर्त्यांनी प्रचाराचा धडाका सुरू केला आहे. प्रत्येक वॉर्डात महाविकास आघाडीची एकजूट पाहायला मिळत आहे.
उपनेते विजय साळवी यांच्या प्रमुख उपस्थितीत मंगळवारी सचिन बासरे यांचा अर्ज भरण्यासाठी भव्य रॅली निघाली. खांद्यावर भगवा, गळ्यात उपरणे, हाती मशाल घेऊन कोण आला रे कोण आला… शिवसेनेचा वाघ आला अशा घोषणा देत भगवेमय वातावरण तयार झाले होते. खडकपाडा ते वसंत व्हॅली येथील मुंबई विद्यापीठाच्या उपकेंद्रापर्यंत महाविकास आघाडीचाच बोलबाला होता.
कल्याण पश्चिम हा शिवसेनेचा बालेकिल्ला असून मशाल चिन्हासमोरील बटन दाबून मतदार सचिन बासरे यांना मोठ्या मताधिक्याने विजयी करतील असा विश्वास यावेळी विजय साळवी यांनी व्यक्त केला.
