चंद्रपूरमध्ये वाघनखांची विक्री करणाऱ्या दोघांना स्थानिक गुन्हे शाखेच्या पथकाने अटक केली आहे. मंगळवारी सायंकाळी ही कारवाई करण्यात आली. नंदकिशोर साहेबराव पिंगळे (वय – 59, रा. सिव्हिल लाइन, रामनगर ) आणि रवींद्र शिवचंद्र बोरकर (वय – 65) अशी आरोपींची नावे असून त्यांच्या ताब्यातून दोन वाघनखं जप्त करण्यात आली आहेत. पोलिसांनी वाघनखांसह या दोघांनाही वन विभागाच्या सहायक वनसंरक्षकांच्या स्वाधीन केले आहे.
जिल्ह्यामध्ये सुरू असलेल्या अवैध धंद्यांविरुद्ध स्थानिक गुन्हे शाखेचे पोलिस निरीक्षक महेश कोंडावार यांच्या नेतृत्वात विशेष मोहीम राबवली जात आहे. स्थानिक गुन्हे शाखेच्या पथकाला दोन व्यक्ती वाघनखांची विक्री करण्यासाठी येत असल्याची माहिती मिळाली. त्यानंतर छापा टाकून त्यांना अटक करण्यात आली.
