चंद्रपूर जिल्हात 62 मतदान केंद्रावर हजारो बोगस मतदारांची ऑनलाइन नोंदणी झाल्याचा धक्कादायक प्रकार उघडकीस आला आहे.ऑनलाईन नोंदणी झालेले हे सर्व मतदार परप्रांतीय आहे. निवडणूक आयोगाच्या प्राथमिक चौकशीदरम्यान या मतदार नोंदणीतील अनियमितता उघडकीस आल्याने प्रशासनात खळबळ उडाली आहे. या प्रकारामुळे आगामी निवडणुकीच्या निष्पक्षतेवर प्रश्नचिन्ह उपस्थित झाले आहे.
मतदार यादीतील नावे आणि नोंदणीकृत माहितीची सखोल छाननी सुरू असताना काही स्थानिकांच्या ही बाब लक्षात आली. त्यानंतर प्रशासनाने मतदार यादी तपासली असता, अनेक बोगस मतदारांची नोंदणी आढळली. हजारो परप्रांतीयांची नावे, खोटा मोबाईल क्रमांक व बनावट पत्ते आणि जन्मतारीख या नोंदवलेल्या मतदार यादीत आढळल्या आहेत. विशेष म्हणजे बहुतांश ऑनलाईन अर्ज रात्री 12 वाजेनंतर भरण्यात आल्याचे दिसून आले.
पैसे देऊन भरले अर्ज
गडचांदूर येथील एका कार्यालयात आजूबाजूच्या गावातील काही युवकांना पाचशे रुपये प्रतिदिन याप्रमाणे मजुरी देऊन, मतदाराची बोगस नावे, त्यांचे आधार क्रमांक, चुकीचा मोबाईल क्रमांक व ओटीपी पुरवून अर्ज भरायला लावले असल्याची चर्चा आहे. विशेष म्हणजे वेबसाईटवर फोटो अपलोड करण्याच्या ठिकाणी भिंतीचा फोटो व आधार अपलोड करण्याच्या ठिकाणी भिंतीचाच फोटो अपलोड करण्यात आला आहे. त्यामुळे ऑनलाइन उपलब्ध झालेल्या यादीमध्ये बोगस मतदाराचा फोटो उपलब्ध नाही. तालुक्यातील गडचांदूर, कोरपना, लखमापूर, नांदा, बिबी, बाखर्डी, आवाळपूर, उपरवाही या मोठ्या गावांमध्ये मोठ्या प्रमाणात बोगस नावांची नोंद झालेली आहे.
