विधानसभा निवडणुकीत तिकीट वाटपावरून महायुतीत बेबनाव सुरू असताना आता भाजपचे स्थानिक नेते आणि माजी मंत्री राज पुरोहित यांनी आज भाजपच्या प्रदेश कार्यालयाबाहेर राजस्थानी समाज बांधवांना घेऊन ठिय्या मारला होता. मुंबादेवी किंवा कुलाबा विधानसभा मतदारसंघातून उमेदवारी मिळावी म्हणून भाजपवर मोर्चाच्या माध्यमातून दबाव टाकल्याची चर्चा होती.
विधानसभा निवडणुकीच्या तिकीट वाटपाची महायुतीमधील चर्चा भाजपच्या दिल्लीतील पक्ष श्रेष्ठींच्या दरबारात पोहोचलेली आहे, मात्र दुसरीकडे भाजपचे स्थानिक नेते मुंबईत रस्त्यावर उतरले आहेत.
राज पुरोहित यांच्यासाठी राजस्थानी समाजाने निवेदन प्रसिद्ध केले आहे. राज पुरोहित आणि त्यांचे समाज बांधव हे निवेदन घेऊन नरिमन पॉईंट येथील भाजप प्रदेश कार्यालया बाहेर पोहोचले आणि ठिय्या दिला. या अनपेक्षित प्रकारामुळे भाजप प्रदेश कार्यालयात एकच धावपळ उडाली. भाजप प्रदेश कार्यालयातील काही पदाधिकाऱयांनी राज पुरोहित यांचे हे निवेदन स्वीकारले.
