बदलापूर येथील एका नामांकित शाळेत दोन चिमुरड्यांवर झालेल्या लैंगिक अत्याचार प्रकरणातील आरोपी नराधम अक्षय शिंदे याचा पोलिसांनी सोमवारी एन्काऊंटर केला. त्यानंतर राजकीय क्षेत्रातून वेगवेगळ्या प्रतिक्रिया समोर येत आहेत. राष्ट्रवादी काँग्रेस शरदचंद्र पवार पक्षाच्या खासदार सुप्रिया सुळेंनी या प्रकरणावर प्रतिक्रिया देत आरोपीचे दोन्ही हात बांधलेले असताना त्याने फायरिंग कसे केले? असा प्रश्न विचारत सामान्य नागरिकांबरोबरच आता पोलिसांचीही काळजी वाटू लागल्याचा जबरदस्त टोला लगावला आहे.
बदलापूर अत्याचार प्रकरणातील मुख्य आरोपी अक्षय शिंदे याच्या एन्काऊंटरवर सुप्रिया सुळे यांनी आपली प्रतिक्रिया दिली. यावेळी त्या म्हणाल्या, या प्रकरणाची चौकशी झाली पाहिजे. आपला देश नियम कायदे आणि संविधानाने चालतो. मला या प्रकरणामुळे पोलिसांचीही काळजी वाटते. कारण एक आरोपी जर त्याचे दोन्ही हात बांधलेले असताना बंदूक हिसकावत त्याने पोलिसांवर फायरिंग कसे केले? त्यामुळे मी फार काळजीत पडले आहे. या राज्यातल्या नागरिकांच्या सुरक्षेचा विषय आहेच पण त्याच बरोबर पोलीसांच्या सुरक्षेचा मुद्दाही उपस्थित होत आहे. दुर्देवाने आपल्या राज्याची अशी स्थिती झाल्याचे खेद होत असल्याचेही सुप्रिया सुळे म्हणाल्या.
