गोंदिया जिल्ह्यातील नागझिरा अभयारण्यातील मंगेझरी जंगलात एक वाघ मृत अवस्थेत आढळून आल्याने खळबळ उडाली आहे. वन विभागाचे कर्मचारी गस्त घालत असताना जंगलात वाघ आढळून आला. आधी वन कर्मचाऱ्याना वाटलं वाघ झोपला असावा मात्र बराच वेळ होऊन देखील वाघाने कुठलीही हालचाल केली नाही. मग जवळ जाऊन पाहिल्यावर वाघाचा मृत्यू झाल्याचे लक्षात आले.
घटनेची माहिती वरिष्ठ अधिकारी यांना देण्यात आली. डॉक्टरांची टीम बोलावून शवविच्छेदन करण्यात आले. दोन वाघांच्या झुंजीत टी -9 वाघ बेशुद्ध होऊन त्याचा मृत्यू झाला असल्याचा प्राथमिक अंदाज वर्तविण्यात आला आहे.
