दिल्लीतील श्रद्धा हत्याकांडाची पुनरावृत्ती कर्नाटकात झाली आहे. एका 29 वर्षीय महिलेची हत्या करून मृतदेहाचे 30 तुकडे करून फ्रीजमध्ये ठेवले. बंगळुरुतील मल्लेश्वरम परिसरात ही घटना घडली. महालक्ष्मी असे मयत महिलेचे नाव आहे. याप्रकरणी व्यालीकवल पोलिस ठाण्यात गुन्हा नोंद करण्यात आला आहे. ही हत्या कुणी आणि कोणत्या कारणातून केली याबाबत पोलीस तपास करत आहेत.
महालक्ष्मी ही दुसऱ्या राज्यातील असून कामानिमित्त ती बंगळुरूत एकटीच राहत होती. येथील एका मॉलमध्ये काम करून ती आपला उदरनिर्वाह करत होती. महालक्ष्मी विवाहित असून पतीपासून वेगळी राहत होती. तिचा पती शहरापासून दूर एका आश्रमात काम करत होता. पत्नीच्या हत्येची माहिती मिळताच तो घटनास्थळी दाखल झाला.
घटना उघड होताच वरिष्ठ अधिकाऱ्यांसह पोलीस पथक घटनास्थळी दाखल झाले. पोलिसांनी इमारतीकडे जाणारे रस्ते बंद केले. श्वानपथक आणि फॉरेन्सिक टीमने घटनास्थळी पोहचत तपास सुरू केला. आठवडाभरापूर्वी महालक्ष्मीची हत्या झाली असावी असा अंदाज पोलिसांनी वर्तवला आहे.
हत्याकांड उघड होताच मल्लेश्वरम परिसरात एकच खळबळ उडाली आहे. पोलिसांनी तपास सुरू केला असून प्रकरणाची चौकशी सुरू आहे.
