रस्ते अपघातात सख्ख्या चुलत भावांचा मृत्यू झाल्याची घटना पाथर्डीत घडली आहे. भगवान मुरलीधर कुटे (35) आणि योगेश शिवाजी कुटे (26) अशी मयत भावांची नावे आहेत. याप्रकरणी पाथर्डी पोलिसात अकस्मात मृत्यूची नोंद करण्यात आली आहे. पुढील तपास पोलीस निरीक्षक संतोष मुटकुळे यांच्या मार्गदर्शनाखाली पोलीस हेडकॉन्स्टेबल सुहास गायकवाड करीत आहे.
भगवान कुटे हा मंगळवारी रात्री आपल्या सायकलवरून धामणगावकडे जात होता. तर योगेश कुटे धामणगाववरून पाथर्डीच्या दिशेने दुचाकी घेऊन जात होता. वनदेव डोंगराच्या घाटीतील उतावरावर असलेल्या जुन्या दगड खाणीजवळ दोघांचा अपघात झाला. यात योगेशचा जागीच मृत्यू झाला तर भगवान गंभीर जखमी झाला. त्याला उपचारासाठी प्रथम पाथर्डी येथील उपजिल्हा रुग्णालयात नंतर पुढील उपचारासाठी नगरला दाखल करण्यात आले होते. मात्र बुधवारी उपचारादरम्यान त्याचा मृत्यू झाला.
अपघात नेमका कसा घडला हे समजू शकले नाही. घटनास्थळी सायकल आणि दुचाकी पोलिसांना अपघाताच्या स्थितीमध्ये आढळून आली. भरधाव वेगाने आलेल्या वाहनाने या दोघांना उडवले की दोघांची आपसात धडक झाली, हे समजू शकले नाही. योगेश कुटे याचे पाथर्डीत इलेक्ट्रॉनिक्सचे दुकान होते तर भगवान कुटे शेती करून मजुरी करायचा. या घटनेनंतर कुटे कुटुंबावर दुःखाचा डोंगर कोसळला आहे.
