मुंबईतील गिरगावात एक संतापजनक घटना उघडकीस आली आहे. जन्मदात्या बापानेच पोटच्या दोन मुलींवर लैंगिक अत्याचार केल्याचे समोर आले आहे. बापाच्या लैंगिक छळाला कंटाळून मोठी मुलगी अनाथालयात गेली. तर लहान मुलीनेही आईसोबत घर सोडले आहे. घटना उघड होताच सर्वत्र संतापाची लाट उसळली आहे. व्हीपी रोड पोलिसांनी नराधम बापाला अटक केली आहे. न्यायालयाने आरोपीला चार दिवसांची पोलीस कोठडी सुनावली आहे.
आरोपी पत्नी आणि दोन मुलींसह गिरगावात राहत होता. काही महिन्यांपूर्वी 18 वर्षीय मोठ्या मुलीवर लैंगिक अत्याचाराची घटना घडली होती. याबाबत बालकल्याण समितीकडेही तक्रार करण्यात आली होती. यानंतर मोठ्या मुलीला अनाथालयात पाठवण्यात आले.
मोठी मुलगी अनाथालयात गेल्यानंतर वडिलांनी लहान मुलीवर अत्याचार करण्यास सुरवात केली. एक दिवस मुलींची आई मोठ्या मुलीला भेटायला अनाथालयात गेली आणि तिने वडील लहान मुलीवर अत्याचार करत असल्याचे तिला सांगितले. यानंतर मोठ्या मुलीने आपल्यासोबतही वडिलांनी अत्याचार केल्याचे सांगितले. हे ऐकताच आईला मोठा धक्का बसला.
मोठी मुलगी पाच वर्षांची असल्यापासून वडील तिचा लैंगिक छळ करत असल्याची धक्कादायक माहिती पोलीस तपासात उघड झाली. याबाबत कुठेही वाच्छता केल्यास जीवे मारण्याची धमकी मुलीला देण्यात आली होती. याप्रकरणी मोठ्या मुलीने बालकल्याण समितीकडे तक्रार दिली. बालकल्याण समितीने वर्सोवा पोलीस ठाण्यात तक्रार दाखल केली. मात्र हे प्रकरण गिरगावातील असल्याने व्हीपी रोड पोलिसात हे प्रकरण वर्ग करण्यात आले आहे. पोलिासांनी आरोपी बापाला अटक केली आहे.
