रस्त्यावरील खड्डा चुकवण्याचा प्रयत्न करत असतानाच नियंत्रण सुटल्याने आयशर ट्रक कालव्यात पडला. या घटनेत सात प्रवाशांचा जागीच मृत्यू झाला आहे. आंध्र प्रदेशातील पूर्व गोदावरी जिल्ह्यात देवरापल्ली गावाजवळ मंगळवारी रात्री उशिरा ही दुर्घटना घडली.
आयशर ट्रक जांगरेड्डीगुडेम येथून काजू आणि आठ प्रवासी घेऊन जात होता. देवरापल्ली गावाजवळ रस्त्यावरील खड्डे चुकवण्याच्या प्रयत्नात चालकाचे वाहनावरील नियंत्रण सुटले. यामुळे ट्रक कालव्यात पडला.
या अपघातात ट्रकवर बसलेल्या सात प्रवाशांचा जागीच मृत्यू झाला. एका प्रवाशाला वाचवण्यास यश आले असून त्याला उपचारासाठी रुग्णालयात दाखल करण्यात आले आहे. सर्व मृतदेह शवविच्छेदनासाठी कोव्हुरु सरकारी रुग्णालयात नेण्यात आल्याचे पोलीस उपअधीक्षक जी देवा कुमार यांनी सांगितले.
