पासपोर्ट काढण्यासाठी आता सरकारच्या ऑनलाइन पोर्टलचा वापर मोठ्या प्रमाणात करण्यात येतो. मात्र पासपोर्ट अर्जांसाठीचे ऑनलाइन पोर्टल पुढील पाच दिवस मेन्टेनन्ससाठी बंद करण्यात येणार आहे, अशी माहिती सरकारकडून देण्यात आली आहे. या कालावधीत कोणत्याही नवीन अपॉइंटमेंट्स शेड्यूल करता येणार नाही. आधी बुक केलेल्या अपॉइंटमेंट्सचे काय होणार असा प्रश्न असेल तर ही बातमी महत्त्वाची आहे. कारण आधी बुक करण्यात आलेल्या अपॉइंटमेंट्स पुन्हा शेड्यूल केल्या जाणार असल्याचंही सांगण्यात आलं आहे.
‘पासपोर्ट सेवा पोर्टल 29 ऑगस्ट 2024, गुरुवार 20:00 तास IST ते 2 सप्टेंबर, सोमवार 06:00 IST पर्यंत तांत्रिक कारणांसाठी बंद असेल. या कालावधीत नागरिकांसाठी आणि सर्व MEA/RPO/BOI साठी सिस्टम उपलब्ध नसेल. /ISP/DoP/पोलिस प्राधिकरणे 30 ऑगस्ट 2024 साठी आधीच बुक केलेल्या अपॉइंटमेंट्स योग्यरित्या पुन्हा शेड्यूल केल्या जातील आणि अर्जदारांना सूचित केले जाईल’, असे पासपोर्ट सेवा पोर्टलवरील नोटमध्ये म्हटले आहे.
ही नेहमीच प्रक्रिया असल्याचं परराष्ट्र मंत्रालयानं म्हटलं आहे. ‘अपॉइंटमेंट्स पुन्हा शेड्युलिंगसाठी, आमच्याकडे नेहमीच योजना असतात. सार्वजनिक केंद्रीभूत सेवेसाठी (पासपोर्ट सेवा केंद्रांसारख्या) असे मेन्टेनन्स नेहमीच अगोदरच नियोजित केले जातात जेणेकरून लोकांची कोणतीही गैरसोय होणार नाही. त्यामुळे कामकाजाची वेळ पुन्हा शेड्यूल करणे हे अडचणीचे ठरणार नाही’, असं मंत्रालयातील एका सूत्रानं सांगितल्याचं एनडीटीव्हीच्या वृत्तात म्हटलं आहे.
पासपोर्ट सेवा पोर्टलचा वापर नवीन पासपोर्टसाठी अर्ज करण्यासाठी किंवा पासपोर्टचे नूतनीकरण करण्यासाठी देशभरातील केंद्रांवर अपॉइंटमेंट्स बुक करण्यासाठी केला जातो. नियुक्तीच्या दिवशी, अर्जदारांनी पासपोर्ट केंद्रांवर पोहोचणे आवश्यक आहे आणि पडताळणीसाठी त्यांची कागदपत्रे प्रदान करणे आवश्यक आहे. यानंतर, पोलीस पडताळणी होते आणि त्यानंतर पासपोर्ट अर्जदाराच्या पत्त्यावर पोहोचतो.
अर्जदार रेग्युलर मोड निवडू शकतात, ज्यामध्ये पासपोर्ट 30-45 कामकाजाच्या दिवसांत अर्जदारापर्यंत पोहोचतो किंवा तत्काळ मोड ज्यामध्ये तो काही दिवसांत पोहोचतो.
