देवेंद्र फडणवीस यांनी मुख्यमंत्री असताना चुकीच्या पद्धतीने मराठा आरक्षणाचा कायदा केला. अधिकार नसताना देण्यात आलेले हे आरक्षण न्यायालयात टिकले नाही असा गंभीर आरोप काँग्रेसचे नेते तथा माजी मुख्यमंत्री पृथ्वीराज चव्हाण यांनी केला. पृथ्वीराज चव्हाण यांनी गुरूवारी आंतरवालीत मनोज जरांगे पाटील यांची भेट घेतली.
माजी मुख्यमंत्री पृथ्वीराज चव्हाण हे आंतरवालीत मनोज जरांगे यांना भेटण्यासाठी आले होते. दोघांमध्ये तासभर चर्चा झाली. त्यानंतर त्यांनी माध्यमांशी संवाद साधला. यावेळी बोलताना पृथ्वीराज चव्हाण यांनी देवेंद्र फडणवीस यांच्यावर गंभीर आरोप केला. मुख्यमंत्री असताना फडणवीसांनी चुकीच्या पद्धतीने मराठा आरक्षणाचा कायदा केला. राज्य सरकारला अधिकार नसताना करण्यात आलेला हा कायदा कुचकामी असल्यामुळे तो न्यायालयात टिकला नाही, असे पृथ्वीराज चव्हाण म्हणाले. यावेळी त्यांच्यासमवेत माजी खासदार रजनी पाटील या होत्या.
मनोज जरांगे यांच्या प्रकृतीची चौकशी करण्यासाठी आलो होतो. आमच्यात कुठलीही राजकीय चर्चा झाली नाही असे पृथ्वीराज चव्हाण म्हणाले. मनोज जरांगे पाटील यांनीही त्यास दुजोरा दिला.
