देवेंद्र फडणवीस आता राजीनामा देण्याची भाषा करत आहेत. हा पश्चाताप करून घेण्याची वेळ का आली याचा विचार करा. तुम्ही मराठ्यांची फसवणूक केली आहे, त्यामुळे याची शिक्षा तुम्हाला भोगावीच लागणार, असा जोरदार हल्लाबोल मनोज जरांगे पाटील यांनी फडणवीस यांच्यावर केला.
मी मराठा आरक्षणात कुठलाही खोडा घातला नाही. यासंदर्भात मनोज जरांगे पाटील यांनी मुख्यमंत्री एकनाथ शिंदे यांना विचारावे, नसता मी राजीनामा देतो असे देवेंद्र फडणवीस म्हणाले आहेत. फडणवीसांच्या या वक्तव्यावर प्रतिक्रिया देताना मनोज जरांगे यांनी टीकेचा भडिमार केला. राजीनामा देण्याची भाषा फडणवीस करत आहेत. हा पश्चाताप करून घेण्याची वेळ का आली याचा शोध त्यांनी घेतला पाहिजे. फडणवीसांनी मराठ्यांची फसवणूक केली आहे, असा स्पष्ट आरोप करत जरांगे यांनी त्यांना शिक्षा भोगावीच लागेल असा इशारा दिला.
देवेंद्र फडणवीस यांना पुढचा पश्चाताप टाळायचा असेल तर मराठ्यांना ओबीसी प्रवर्गातून आरक्षण देण्याचा निर्णय घ्या, सरसकट कुणबी प्रमाणपत्र द्या, या मागण्यांचा पुनरुच्चारही मनोज जरांगे यांनी केला. मी मराठा समाजाच्या भल्यासाठी काम करत असल्यानेच माझ्या चौकशीसाठी एसआयटी नेमण्यात आली. आंतरवालीत लाठीहल्ला करणार्‍या जातीयवादी अधिकार्‍यांना बढत्या देण्यात आल्या. आम्हाला राजकारणात उतरण्यासाठी मजबूर करू नका, आम्ही राजकारणात आलो तर तुमचे हाल होतील, असेही मनोज जरांगे म्हणाले.
