पुण्यातील ‘बर्गर किंग’कडून अमेरिकेतील ‘बर्गर किंग कॉर्पेरेशन’च्या नावाचा गैरवापर करण्यात आला नाही. बर्गर किंग कायदेशीर आणि प्रामाणिकपणे व्यवसाय करत असल्याचे निरीक्षण न्यायालयाने नोंदवून ‘बर्गर किंग कॉर्पेरेशन’ने दाखल केलेला दावा निकाली काढला. लष्कर भागातील बर्गर किंगने बर्गर किंग कॉर्पेरेशनविरुद्ध 13 वर्षे सुरू असलेली न्यायालयीन लढाई जिंकली.
समान नावावरुन लष्कर भागातील ‘बर्गर किंग’ आणि अमेरिकेतील ‘बर्गर किंग कॉर्पेरेशन’ यांच्यात वाद होता. ‘बर्गर किंग कॉर्पेरेशन’ने दाखल केलेल्या खटल्यात जिल्हा न्यायाधीश सुनील वेदपाठक यांनी ‘बर्गर किंग’च्या बाजूने निकाल दिला. अमेरिकेच्या ‘बर्गर किंग कॉर्पेरेशन’ने भारतातील प्रतिनिधी पंकज पाहुजा यांच्यामार्फत ‘मेसर्स बर्गर किंग’चे मालक अनाहिता आणि शापूर इराणी यांच्याविरुद्ध दिवाणी दावा दाखल केला होता. व्यापारचिन्ह उल्लंघन, नुकसान भरपाई, पुण्याच्या बर्गर किंगला ट्रेड मार्कच्या वापरास कायमस्वरूपी मनाई, अशा प्रतिबंधक आदेशांसाठी अमेरिकेच्या ‘बर्गर किंग’कडून दावा दाखल करण्यात आला होता. ‘बर्गर किंग’च्या वतीने ऍड. ए. डी. सरवटे, ऍड. सृष्टी आंगणे, ऍड. राहुल परदेशी यांनी बाजू मांडली.
अमेरिकेतील फ्लोरिडात ‘बर्गर किंग’ नावाने हॉटेल सुरू केले होते. या साखळी उपाहारगृह उद्योगाच्या अमेरिकेसह जगभरात शंभराहून अधिक देशांत 13 हजार शाखा आहेत.
कंपनीला 2008 मध्ये पुण्यात सारख्याच नावाने आधीच एक उपाहारगृह सुरू केल्याची माहिती मिळाली. त्यामुळे कंपनीने जून 2009 मध्ये आपल्या वकिलांमार्फत पुण्यातील ‘बर्गर किंग’ला आपला व्यवसाय थांबवण्याची नोटीस बजावून सामंजस्याने हे प्रकरण मिटविण्याचा प्रस्ताव दिला होता.
‘बर्गर किंग’ हे व्यापार चिन्ह आणि व्यावसायिक नाव 1954 पासून ते वापरत आहेत. या कंपनीने 2014 पासून नवी दिल्लीत आणि नंतर मुंबई आणि पुण्यात उपाहारगृहे सुरू केली.
