ज्येष्ठ नाट्यलेखक प्र. ल. मयेकर यांच्या नवव्या स्मृतिदिनानिमित्त समर्थ रंगभूमी निर्मित ‘प्र.ल.’ हा माहितीपट रविवार, 18 ऑगस्ट रोजी सायंकाळी 6 वाजता दूरदर्शनच्या सह्याद्री वाहिनीवरून प्रसारित होणार आहे.
2016 मध्ये पत्रकार दुर्गेश आखाडे आणि समर्थ रंगभूमी रत्नागिरी यांनी ‘प्र.ल.’ माहितीपटाची निर्मिती केली. या माहितीपटाची संकल्पना आणि लेखन दुर्गेश आखाडे यांची आहे. माहितीपटाचे निवेदन अभिनेता अविनाश नारकर, प्रमोद पवार आणि अभिनेत्री मयुरा जोशी यांनी केले आहे, तर दिग्दर्शन श्रीकांत पाटील आणि दुर्गेश आखाडे यांनी केले आहे. छायाचित्रण अजय बाष्टे, संकलन धीरज पार्सेकर, पार्श्वसंगीत योगेश मांडवकर आणि ध्वनिमुद्रण उदयराज सावंत यांनी केले आहे.
माहितीपटाचे निर्माते श्रीकांत पाटील आहेत. ‘प्र.ल.’ या माहितीपटात ज्येष्ठ नाटककार प्र. ल. मयेकर यांच्यासोबत काम केलेले अनेक दिग्गज कलाकार पाहायला मिळतात. त्यामध्ये ज्येष्ठ दिग्दर्शक कुमार सोहनी, अभिनेते अरुण नलावडे, चिन्मय मांडलेकर, निर्माते प्रसाद कांबळी, पटकथाकार कांचन नायक, ऐश्वर्या नारकर, शीतल शुक्ल, माधवी जुवेकर, डॉ. रवी बापट, पद्मश्री वाघ आणि विशाखा सहस्रबुद्धे यांचा समावेश आहे.
