शिवसेना पक्षप्रमुख, माजी मुख्यमंत्री उद्धव ठाकरे यांच्या संकल्पनेनुसार साकार होत असलेल्या कोस्टल रोडलगतच्या जागांचे हरित संवर्धन करून त्या हिरव्यागार करा, अशी विनंती शिवसेना नेते, युवासेना प्रमुख, आमदार आदित्य ठाकरे यांनी आज मुंबई महानगरपालिका आयुक्तांना केली.
आदित्य ठाकरे यांनी महानगरपालिका आयुक्त भूषण गगराणी यांना यासंदर्भात पत्र दिले आहे. उद्धव ठाकरे यांच्या संकल्पनेतील ‘कोस्टल रोड’ हा केवळ शहराच्या वाहतुकीच्या पायाभूत सुविधांचाच नव्हे, तर शहराच्या लँडस्केपचाही कायापालट करणारा होता. जागतिक दर्जाचे रस्ते, पादचारी मार्ग, सायकलिंग ट्रक आणि मोठय़ा मोकळय़ा हिरव्यागार जागा असा मुंबईकरांसाठीचा समृद्ध प्रकल्प होता. शिवाय, पर्यावरणपूरक उपायांमधून हवामान बदलाला रोखणारा आणि पर्यावरणाची काळजी घेणारा प्रकल्प ठरत होता, असे आदित्य ठाकरे यांनी या पत्रात म्हटले आहे.
राखून ठेवलेल्या निधीतूनच हा प्रकल्प व्हावा
z कोस्टल रोडसाठी नियोजित असलेल्या आणि राखून ठेवलेल्या निधीतूनच हा प्रकल्प झाला पाहिजे, असा आग्रहही आदित्य ठाकरे यांनी पत्रात व्यक्त केला आहे. हा शहरातील प्रकल्प आहे आणि संपूर्णपणे मुंबई महानगरपालिकेने राबवलेला आहे. त्यामुळे मुंबई महानगरपालिका रेसकोर्सवरील खासगी तबेल्यांवर 100 कोटी खर्च करणे टाळून तो निधी या प्रकल्पासाठी वापरू शकते, असा उपायही आदित्य ठाकरे यांनी सुचवला आहे. कोस्टल रोडलगतच्या जागांचे नियोजन कशा प्रकारे व्हावे याबद्दल कंत्राटदारांचे नव्हे, तर मुंबईकरांचे म्हणणे ऐकले जाईल, अशी अपेक्षाही आदित्य ठाकरे यांनी व्यक्त केली.
लोकप्रतिनिधी, रहिवाशांकडून सूचना मागवा
कोस्टल रोड दक्षिण मुंबई क्षेत्रातून जातो. त्यामुळे दक्षिण मुंबईचे खासदार तसेच वरळी आणि ताडदेवचे आमदार यांच्यासह स्थानिक लोकप्रतिनिधी, रहिवाशी संस्था, समुदाय यांच्याकडून कोस्टल रोडलगतच्या जागांचा सर्वोत्तम वापर कसा करता येईल याबद्दल सूचना मागवाव्यात, असेही आदित्य ठाकरे यांनी पत्रात म्हटले आहे.
आंतरराष्ट्रीय तज्ञ, पर्यावरण संस्थांची मदत घ्या
z वरील सर्व बाबी लक्षात घेऊन, कोस्टल रोडच्या वाहतूक वगळता इतर ठिकाणांचे हरित संवर्धन करत उत्तम प्रकारे लँडस्केप कसे करता येईल हे ठरवण्यासाठी आम्ही पूर्वी नियोजित केल्यानुसार जागतिक स्तरावरील स्पर्धा आयोजित करा. या कामासाठी आंतरराष्ट्रीय दर्जाच्या तज्ञांची व पर्यावरणासाठी काम करणाऱया संस्थांची मदत घ्या, असे आदित्य ठाकरे यांनी नमूद केले आहे.
