मराठा आरक्षणासाठी उपोषणाला बसलेल्या मनोज जरांगे-पाटील यांच्यावर विखारी टीका करणारे अजय महाराज बारस्कर यांची कार बुधवारी अज्ञात व्यक्तींनी पेटवून दिली.बारस्कर महाराज आषाढी एकादशीच्या निमित्ताने पंढरपूर येथे आले होते. भक्तीसागर येथे मुक्कामी असताना त्यांची कार पेटवून दिल्याची घटना घडली. याप्रकरणी बारस्कर महाराज यांनी पंढरपूर तालुका पोलीस ठाण्यात तक्रार दिली आहे.
दरम्यान, या प्रकरणी पोलीस यंत्रणा तपास करत आहे. पेटवलेली कार टोयोटा कंपनीची असून त्याची किंमत 10 लाख रुपये असल्याचे बारस्कर महाराज यांनी तक्रारीत नमूद केले आहे.
दरम्यान, बारस्कर महाराज यांनी या जाळपोळीमागे जरांगे-पाटील यांच्या समर्थकांचा हात असल्याचा थेट आरोप केला आहे. “मराठा आरक्षणावर जरांगे-पाटील यांचे आपण पितळ उघडे पाडले म्हणून त्यांच्या समर्थकांच्या मला सतत धमक्या येत असतात. माझी गाडी त्यांनीच जाळली आहे. पोलिसांनी मी तसे सांगितले”, अशी प्रतिक्रिया बारस्कर महाराज यांनी दिली.
