बाबा पेट्रोल पंपाजवळील (महावीर चौक) कामगार कार्यालयासमोर मिंधे गटाचे गद्दार आमदार संजय शिरसाट यांच्या कुटुंबियांच्या गाडीवर दगड फेकल्याचा प्रकार रविवारी रात्री नऊच्या सुमारास घडला. या वेळी शिरसाट यांच्या पत्नी, कन्या व मुलगा गाडीत असल्याची माहिती प्रत्यक्षदर्शीनी दिली.
शिरसाट यांचे कुटुंबीय गाडीने जात असताना त्यांना रस्त्याच्या कडेला भांडणे सुरू असल्याचे दिसले. त्यामुळे त्यांनी गाडी थांबवली. तेवढ्यात बाजूने जाणाऱ्या दुचाकीस्वाराने दुचाकी थांबवून शिरसाट यांच्या गाडीवर दगड फेकला. त्यामुळे चालक आणि कुटुंबीय खाली उतरले. त्या वेळी तो दुचाकीस्वार पळून गेला. गाडीला धक्का लागल्याने थोडा गोंधळ झाला, असे आमदार शिरसाट यांच्या कन्या हर्षदा यांनी सांगितले. या घटनेची माहिती मिळताच पोलिसांनी घटनास्थळी धाव घेतली. रात्री उशिरापर्यंत या भागातील सीसीटीव्ही चित्रीकरण तपासण्याचे काम सुरू होते.
