आमदार, खासदारांच्या विरोधातील खटले चालवणाऱ्या विशेष सत्र न्यायालयाचे न्यायाधीश राहुल रोकडे यांची बदली करण्यात आली आहे. त्यांच्या न्यायालयात काही सत्ताधारी आमदार, मंत्र्यांविरोधातील खटले सध्या अंतिम टप्प्यात आहेत. फोर्ट येथील विशेष न्यायालयातून दिंडोशी सत्र न्यायालयात त्यांची बदली झाली आहे.
उपमुख्यमंत्री अजित पवार यांचा सहभाग असलेला 25 हजार कोटींचा शिखर बँक घोटाळा, अन्न व नागरी पुरवठामंत्री छगन भुजबळ यांच्याशी संबंधित महाराष्ट्र सदन व कलिना मध्यवर्ती ग्रंथालय घोटाळा, एकनाथ खडसे हे आरोपी असलेला भोसरी भूखंड गैरव्यवहार आदी घोटाळय़ांचे खटले अंतिम टप्प्यात पोहोचले आहेत. विशेष सत्र न्यायाधीश राहुल रोकडे यांच्यापुढेच मागील काही वर्षांपासून या खटल्यांची सुनावणी सुरू आहे. नवनीत राणा व रवी राणा या दाम्पत्याविरोधातील हनुमान चालिसा पठणचा खटलाही त्यांच्याच कोर्टात सुरू आहे. काही दिवसांपूर्वी त्यांनी विधानसभा अध्यक्ष राहुल नार्वेकर यांना तीन हजार रुपयांचा दंड ठोठावला होता, तर राज्य मध्यवर्ती ग्रंथालय घोटाळय़ात छगन भुजबळ यांना वॉरंटचा इशारा दिला होता. तसेच शिखर बँक घोटाळय़ात अजित पवार यांना मुंबई पोलिसांनी दिलेली ‘क्लीन चिट’ ईडीच्या विरोधामुळे लटकली आहे. त्यावर न्यायाधीश रोकडे 12 जुलैला सुनावणी करणार होते. याचदरम्यान त्यांची दिंडोशी येथील सत्र न्यायालयात बदली झाली आहे. ते येत्या सोमवारी दिंडोशी येथील पदभार स्वीकारणार असल्याचे समजते.
