नशा करणाऱया तरुणावर कारवाई केल्याने दोघांनी पोलिसांशी हुज्जत घातल्याची घटना कांदिवली येथे घडली. या प्रकरणी कांदिवली पोलिसांनी भव्य शहा आणि कौशील शहाविरोधात गुन्हा नोंद केला आहे.
तक्रारदार हे कांदिवली पोलीस ठाण्यात कर्तव्यास होते. गेल्या आठवडय़ात ते बिट मार्शल म्हणून कर्तव्यास होते. रात्री ते कांदिवलीच्या महावीरनगर येथे गस्त करत होते. तेव्हा तेथे एक जण गांजा पिताना दिसून आला. त्याला पोलिसांनी ताब्यात घेतले. त्याला पोलीस ठाण्यात नेले जात होते. तेव्हा तेथे प्रचंड गर्दी झाली. पोलिसांनी जमावाला गर्दी करू नये असे सांगितले. त्याच दरम्यान गर्दीतून एकाने पोलिसांशी हुज्जत घालण्याचा प्रयत्न केला. नशा करणाऱया त्या तरुणाला सोडून द्यावे असे सांगून तो पोलिसांना शिवीगाळ करत होता. शिवीगाळ करणाऱयाला शांत राहण्यास सांगितले. मात्र तो ऐकत नव्हता. त्याच दरम्यान दोघांनी तक्रारदार यांची कॉलर पकडून धक्काबुक्की केली. सरकारी कामात अडथळा आणल्याप्रकरणी त्या दोघांविरोधात गुन्हा नोंद केला.
