मुंबईच्या ऐतिहासिक वानखेडे स्टेडयमवर मुंबईच्या माजी कर्णधारांचा सन्मान सोहळा आयोजित करण्यात आला होता. या सोहळ्याला खराब कामगिरीमुळे टीकाकारांच्या निशाण्यावर असलेला पृथ्वी शॉ सुद्दा उपस्थित होता. यावेळी त्याने अर्जुन तेंडूलकर सोबतचा 2011 विश्वचषक फायलनमधला एका किस्सा सर्वांना सांगितला.
मुंबईतील ऐतिहासिक वानखेडे क्रिकेट स्टेडियमने यावर्षी आपले अर्ध शतक पूर्ण केले आहे. यासाठी 19 जानेवारी रोजी स्टेडियमवर भव्यदिव्य कार्यक्रमाचे आयोजन करण्यात आले आहे. परंतु यापूर्वी स्टेडियममध्ये मुंबई संघाचे नेतृत्व केलेल्या माजी कर्णधारांचा एक सन्मान सोहळा आयोजित करण्यात आला होता. या सोहळ्याला पृथ्वी शॉ सुद्दा उपस्थित होता. सध्या पृथ्वी हा खराब कामगिरी, फिटनेसमुळे वादाच्या भोवऱ्यात अडकला आहे. दरम्यान, त्याने या सोहळ्यानिमित्त सचिन तेंडूलकरचा मुलगा अर्जुन तेंडूलकर सोबतचा एक मजेशीर किस्सा सांगितला आहे.
हिंदुस्थानने 2011 चा विश्वचषक उंचावला तेव्हा हा ऐतिहासिक सामना पृथ्वीने अर्जुन तेंडूलकरसोबत वानखेडे स्टेडियममध्ये पाहिला होता. तेव्हा त्याचे वय फक्त 11 वर्ष होते. “या स्टेडियमसोबत माझी पहिली आठवण मी कधीही विसरू शकत नाही. जेव्हा मी इथे वर्ल्डकप फायनल पहायला आलो होतो. तेव्हा मी 11 वर्षांचा होतो. मी आणि अर्जुन आम्ही एकत्र फायनलचा सामना लाईव्ह बघीतला होता. टीम इंडियाने ट्रॉफी उंचावली तो क्षण मी कधीही विसरू शकत नाही. लहान असताना मी नेहमी विचार करायचो की, कधी मला वानखेडे स्टेडियमवर खेळण्याची संधी मिळतीये आणि आता पहा या स्टेडियमचा 50 वा वर्धापनदिन आपण साजरा करत आहोत. हा खास सोहळा आपण सर्वांनी मिळून साजरा केला पाहिजे.” असे पृथ्वी शॉ ने यावेळी सांगितले.
