26/11 च्या मुंबईवरील दहशतवादी हल्ल्याचा मुख्य सूत्रधार तहव्वूर राणाला घेऊन अमेरिकेतून विशेष विमान नवी दिल्ली विमानतळवार दाखल झाले आहे. राणाच्या प्रत्यार्पणाला स्थगिती देण्याचा त्याचा अर्ज अमेरिकेच्या सर्वोच्च न्यायालयाने फेटाळल्यानंतर त्याला हिंदुस्थानात आणण्यात आले. NIA तपास पथकाच्या अधिकाऱ्यांनी त्याला ताब्यात घेत दिल्लीत आणले आहे.
हिंदुस्थानात आणल्यानंतर पथक त्याचा ताबा घेणार असून त्याला NIA च्या मुख्यालयात नेणार येणार आहे. तिथे त्याची चौकशी होणार आहे. त्यानंतर त्याला तिहार कारागृहात ठेवण्यात येणार आहे. एनआयएने मुंबई हल्ल्यावरील खटला मुंबईहून दिल्लीत ट्रान्सफर करून घेतला होता. त्यामुळे आता या खटल्याची संपूर्ण सुनावणी दिल्लीत होणार आहे. राणा हा लश्कर ए तोयबाचा दहशतवादी असून मुंबईवरील हल्ल्यापूर्वी येथील संभाव्य लक्ष्यांची टेहाळणी करण्याची जबाबदारी डेव्हिड कोलमन हेडली उर्फ दाऊद सैयद गिलानीवर सोपवण्यात आली होती. हेडलीचा मुंबई दौरा व्यावसायिक कामासाठी दाखवण्यात आला. राणाचा इमिग्रेशन व्यवसाय होता. त्याचाच आधार घेत त्याच्या कंपनीची एक शाखा मुंबईतील ताडदेव परिसरात सुरू होत असल्याचे चित्र निर्माण करण्यात आले. मुंबईत एक इमिग्रेशन सेंटर उभारण्यात आले. त्याच कामासाठी हेडली मुंबईत यायचा. त्याने इमिग्रेशन सेंटरचा कर्मचारी म्हणून व्हिजिटिंग कार्डेही छापली होती, पण सुरक्षा यंत्रणांच्या तपासात या इमिग्रेशन सेंटरमध्ये इमिग्रेशन, व्हिसा किंवा इतर कोणतेही काम झाल्याचे आढळले नाही. एनआयएने याप्रकरणी 25 डिसेंबर 2011 रोजी आरोपपत्र दाखल केले होते.
