पाकिस्तान शनिवार सकाळीच भीषण स्फोटाने हादरले. प्रवाशांची वर्दळ असलेल्या क्वेटा रेल्वे स्थानक परिसरात ही घटना घडली. यात 24 जण ठार झाले असून 46 हून अधिक जण जखमी झाले आहेत. मृतांचा आकडा वाढण्याची शक्यता आहे. या घटनेने पाकिस्तान हादरले आहे.
पाकिस्तानातील स्थानिक प्रसारमाध्यमांच्या वृत्तानुसार, हा स्फोट रेल्वे स्टेशनच्या बुकिंग कार्यालयात झाला. रेल्वे प्लॅटफॉर्म पोहोचताच हा स्फोट झाल्याने प्रवाशांमध्ये प्रचंड घबराट उडाली. बॉम्ब निकामी पथक आणि स्थानिक पोलिसांनी घटनास्थळी दाखल होत तपास सुरू केला आहे.
जाफर एक्सप्रेस सकाळी नऊ वाजण्याच्या सुमारास पेशावरला रवाना होणार होती. याचदरम्यान स्फोटाने रेल्वे स्थानक परिसर हादरवून सोडला. प्राथमिक तपासात ही घटना आत्मघातकी स्फोटाची दिसते. मात्र याबाबत घाईने निष्कर्ष काढणे योग्य ठरणार नाही, असे एसएसपी मोहम्मद बलोच यांनी सांगितले. याप्रकरणी अधिक तपास सुरु आहे.
