विलंबाने उरकाउरकीचा होणारा शिवछत्रपती राज्य क्रीडा पुरस्कार पुन्हा एकदा त्याच ढंगात होणार आहे. शिवजयंतीचा ठरलेला मुहूर्त यंदाही हुकल्यामुळे शुक्रवारी गुड फ्रायडेच्या मुहूर्तावर राज्याचे शालेय शिक्षण व क्रीडा विभाग सन 2022-23 व 2023-24 या दोन वर्षांच्या पुरस्कारानिमित्त तब्बल 159 क्रीडापटूंचा गौरव करणार आहे. उशिरा होत असल्यामुळे हा पुरस्कार देखणा करण्यासाठी राज्याच्या क्रीडा खात्याने जोरदार मेहनत घेत नेहमीच्या उणिवा दूर करण्याचा कसोशीने प्रयत्न केला आहे. राज्यातील दिग्गज नेत्यांच्या उपस्थितीत म्हाळुंगे बालेवाडी येथील शिवछत्रपती क्रीडा संकुलातील बॅडमिंटन सभागृहात हा सोहळा रंगणार आहे.
राज्यातील क्रीडापटूंचा गौरव महाराष्ट्राचे राज्यपाल सी. पी. राधाकृष्णन यांच्या हस्ते केला जाणार आहे. याप्रसंगी मुख्यमंत्री देवेंद्र फडणवीस आणि राजकीय क्षेत्रातील दिग्गज उपस्थित रहाणार आहे. भव्य स्वरूपात होणाऱ्या पुरस्कार समारंभाच्या तयारीची पहाणी क्रीडा व युवक कल्याण मंत्री दत्तात्रय भरणे यांनी आज केली. यावेळी क्रीडा आयुक्त हिरालाल सोनवणे, क्रीडा सहसंचालक सुधीर मोरे आदी मान्यवर उपस्थित होते. पाहणीनंतर क्रीडामंत्री दत्तात्रय भरणे म्हणाले की, ‘यंदाच्या जीवनगौरव पुरस्कारात प्रथमच नारीशक्तीचा गौरव होत आहे. ऑलिम्पिक, विश्व करंडक, आशियाई, राष्ट्रकुल पदक विजेते क्रीडापटू थेट पुरस्काराने सन्न्मानित होणार आहेत. योग खेळाला प्रथमच पुरस्कार दिला जातोय. यामुळे हा पुरस्कार ऐतिहासिक आणि दिमाखदार करण्याचा राज्य शासनाचा मानस आहे. शिवछत्रपती राज्य क्रीडा पुरस्कार समारंभ सर्वांसाठी खुला असून एका ऐतिहासिक सोहळयाचे आपण साक्षीदार व्हा,’ असे आवाहनही क्रीडामंत्र्याकडून करण्यात आले आहे.
सन 1995 नंतर सकाळच्या सत्रात पुरस्कार समारंभ असल्याने पुण्याबाहेरील पुरस्कार्थींची निवास व्यवस्थाही बालेवाडीत करण्यात आली आहे. पुणे जिह्याबाहेरील पुरस्कार्थींचे आगमन संध्याकाळपासून सुरू झाले होते. भव्य व्यासपीठाचे काम अंतिम टप्प्यात सुरू होते. या समारंभाचे लाईव्ह प्रक्षेपण क्रीडा विभागाच्या ‘स्पोर्ट्स महाराष्ट्र’ या यूटय़ूब चॅनेल व फेसबुक पेजवर करण्यात येणार आहे. शिवछत्रपती राज्य क्रीडा जीवनगौरव पुरस्कारासह उत्कृष्ट क्रीडा मार्गदर्शक-जिजामाता पुरस्कार, खेळाडूंसाठीचा शिवछत्रपती राज्य क्रीडा पुरस्कार, शिवछत्रपती राज्य क्रीडा साहसी पुरस्कार ,दिव्यांग खेळाडूंचा शिवछत्रपती राज्य क्रीडा पुरस्कार अशा पाच परिशिष्टात हा पुरस्कार देण्यात येतो. जीवनगौरवसाठी पाच लाख, शिवछत्रपती पुरस्करासाठी तीन लाख रुपये व सन्मानचिन्ह असे या पुरस्काराचे स्वरूप आहे.
सन 2022-23 च्या शिवछत्रपती राज्य क्रीडा पुरस्कारामध्ये ज्येष्ठ आंतरराष्ट्रीय बॅडमिंटन खेळाडू प्रदीप गंधे यांना जीवनगौरव, ऑलिम्पिक प्रशिक्षिका सुमा शिरूर यांना जिजामाता, प्रशिक्षक दिनेश लाड यांच्या उत्कृष्ट मार्गदर्शक, राष्ट्रकुल पदक विजेता अविनाश साबळे यांचा समावेश आहे. सन 2022-23 वर्षासाठी एकूण 70 पुरस्कारांची घोषणा गतवर्षी करण्यात आली होती.
सन 2023-24 च्या शिवछत्रपती राज्य क्रीडा पुरस्कार हा ज्येष्ठ राष्ट्रीय कबड्डीपटू, संघटक शंकुतला खटावकर यांना जीवनगौरव तर पॅरा ऑलिम्पिक पदक विजेता सचिन खिलारी, जागतिक विजेते आर्चर आदिती स्वामी, ओजस देवतळे, क्रिकेटपटू शिवम दुबे, ऋतुराज गायकवाड, यशस्वी जैसवाल, जितेश शर्मा यांना जाहीर झाला आहे. सन 2023-24 वर्षासाठी एकूण 89 पुरस्काराची घोषणा क्रीडामंत्री दत्तात्रय भरणे यांनी मंगळवारी केली होती.
