लोकसभा सदस्यांची आसन व्यवस्था आणि क्रमांक निश्चित करण्यात आले असून केंद्रीय मंत्री नितीन गडकरी यांना पहिल्या ब्लॉकमध्ये चौथ्या क्रमांकावर केंद्रीय गृहमंत्री अमित शहा यांच्या शेजारी जागा देण्यात आली आहे. यापूर्वी त्यांची जागा दुसऱ्या ब्लॉकमधील पहिल्या रांगेत आसन क्रमांक 58 होता. आता त्यात बदल करण्यात आला असून त्यांचा आसन क्रमांक 4 वर आला आहे.
मोदी सरकारमध्ये मंत्रीपद आणि ज्येष्ठत्वाच्या आधारे गडकरी नेहमीच लोकसभेत पहिल्या ब्लॉकच्या पहिल्या रांगेत शहांच्या शेजारी बसतात. परंतु, नव्या रचनेत लोकसभा अध्यक्षांनी गडकरींना दुसऱ्या ब्लॉकमध्ये आसन दिले होते आणि शहांच्या शेजारील 4 क्रमांकाचे आसन रिक्त ठेवले होते. हे आसन भाजपच्या नव्या पक्षाध्यक्षांसाठी राखीव ठेवले जाणार असल्याची चर्चा रंगली होती. दरम्यान, या रचनेमुळे गडकरींचे ज्येष्ठत्व नाकारले गेले गेल्याचे चित्र निर्माण होऊन वाद होण्याची शक्यता असल्याने सावधगिरी बाळगत लगेचच आसन व्यवस्था पूर्ववत करण्यात आल्याचे सांगितले जाते.
बदल चुकून की जाणुनबूजन
लोकसभेतील नवी आसनव्यवस्था 29 नोव्हेंबर रोजी करण्यात आली. परंतु, दोनच दिवसांत संभाव्य गोंधळ टाळण्यासाठी लगेचच त्यात बदल करण्यात आले. गडकरी यांना पुन्हा चौथ्या क्रमांकाचे आसन बहाल करण्यात आले. त्यानंतर आता हा बदल चुकून झाला होता की जाणूनबुजून केला होता याबाबत राजकीय वर्तुळात चर्चा रंगली आहे.
