>> प्रसाद नायगावकर
नागपूर तुळजापूर महामार्गावर यवतमाळ जिल्ह्यातील महागाव येथून प्रवासी घेऊन निघालेल्या रिक्षाला महागाव शहरा जवळ असलेल्या पेट्रोलपंप जवळ एका भरधाव ट्रकने भीषण धडक दिली. यामध्ये रिक्षातील एक महिला व एक पुरुष यांचा जागीच मृत्यू झाला. ही थरकाप उडवणारी घटना जवळच्या असलेल्या पेट्रोल पंपाच्या लावलेल्या सी सी टीव्हीत कैद झाली आहे.
या अपघाताची माहिती मिळताच महागाव पोलिसांनी घटनास्थळी धाव घेतली. मृतदेह चेंदामेंदा झाल्याने मृतकांची ओळख पटविण्याचा प्रश्न पोलिसांसमोर उभा झाला होता. पोलिसांनी चौकशी केली असता सदर अपघातातील मृतक महिलेची ओळख पटवली गेली. तिचे नाव सत्वशिला रामा गायकवाड (वय 74 वर्ष) असल्याची माहिती मिळाली तर मृत इसमाची अद्याप ओळख पटली नसल्याने त्याची ओळख पटविण्याचे आव्हान पोलिसांसमोर उभे ठाकले आहे. या अपघातात जखमी झालेल्या रिक्षा चालक ज्ञानेश्वर ठोंबरे यास उपचारासाठी सवना ग्रामीण रुग्णालयात हलविले आहे.
ट्रक चालक ओमप्रकाश बेदरकर याला अटक करण्यात आली असून पुढील तपास महागाव पोलीस स्टेशनचे ठाणेदार सोमनाथ जाधव यांच्या मार्गदर्शनाखाली पोलीस उपनिरीक्षक केशव पुंजरवाड, सागर अन्नमवार, सुरज काळे, नापोका वसीम शेख यांचेसह पोलिस कर्मचारी करीत आहेत.
