कल्याण ग्रामीण विधानसभा मतदारसंघात शिवसेना (उद्धव बाळासाहेब ठाकरे) पक्षाचे उमेदवार सुभाष भोईर यांचा जोरदार प्रचार सुरू आहे. या निवडणुकीत गद्दारांना घरचा रस्ता दाखवणार असून आमचा विश्वास फक्त ‘मातोश्री’वरच आहे अशा शब्दात ज्येष्ठ शिवसैनिक प्रकाश म्हात्रे यांनी मिंध्यांना ठणकावले आहे. प्रकाश म्हात्रे हे सुभाष भोईर यांच्या प्रचारात जोमाने उतरले असून कोणत्याही परिस्थितीत त्यांना निवडून आणणारच असा निर्धार व्यक्त केला.
कल्याण ग्रामीणमधून शिवसेनेचे सुभाष भोईर, मिंधे गटाचे राजेश मोरे व मनसेचे राजू पाटील अशी तिरंगी लढत होणार आहे. पण ग्रामीण भागातील मतदारांचा भोईर यांना जोरदार पाठिंबा आहे. घरोघरी मतदारांच्या प्रत्यक्ष भेटी घेण्यावर जोर दिला असून संपूर्ण प्रचाराच्या यंत्रणेत शिवसैनिक प्रकाश म्हात्रे यांनी मोठ्या उत्साहाने भाग घेतला आहे. म्हात्रे हे कल्याण ग्रामीणमधील अनुभवी व ज्येष्ठ शिवसैनिक म्हणून ओळखले जातात. त्यांनी ठाणे जिल्हा परिषदेचे सदस्य म्हणूनही काम केले आहे. त्याशिवाय उपजिल्हाप्रमुखपद सांभाळताना त्यांनी अनेक शाखा सुरू करून तळागाळात शिवसेना पोहोचवली.
मिंध्यांचे पदाधिकारी गोपाळ लांडगे यांना माझ्यावर कारवाई करण्याचा काय अधिकार आहे? मी लिखित स्वरूपात शिवसेना (उद्धव बाळासाहेब ठाकरे) पक्षाचा सदस्य आहे. त्यांनी आम्हाला बोलायला भाग पाडू नये, नाहीतर लांडगे यांचे सगळे गुऱ्हाळ बाहेर काढू. त्यामुळे त्यांची मोठी पंचाईत होईल.
– प्रकाश म्हात्रे (निष्ठावंत शिवसैनिक)
