पुण्यातील कल्याणीनगर येथील हिट अँड रन प्रकरणातील अल्पवयीन आरोपीच्या आईला देखील पोलिसांनी अटक केली आहे. आरोपीच्या आईची व अल्पवयीन आऱोपीची समोरासमोर चौकशी केली जाणार आहे. मात्र या प्रकरणातील आरोपीच्या आईला इतक्या उशीरा अटक झाल्यावरून काँग्रेस नेते व विधानसभेतील विरोधी पक्षनेते विजय वडेट्टीवार यांनी सत्ताधाऱ्यांवर निशाणा साधला आहे.
आरोपीच्या आईला इतक्या दिवसांनी अटक करण्यात आली याव रून याप्रकरणात किती तत्पर कारवाई होत आहे ते दिसते, अशी टीका वडेट्टीवार यांनी केली आहे. तसेच या प्रकरणात राजकीय दबाव आणणाऱ्या आमदारावर कधी कारवाई होणार असा सवाल देखील त्यांनी केला आहे. वडेट्टीवार यांनी ट्विटरवरून सत्ताधाऱ्यांवर निशाणा साधला आहे.
”पुणे हिट अँड रन प्रकरणातील आरोपीच्या आईला अखेर इतक्या दिवसांनी अटक करण्यात आली. या प्रकरणात किती तत्पर कारवाई होते याचे उदाहरण आहे. सदर प्रकरणात हस्तक्षेप करून राजकीय दबाव आणणाऱ्या आमदाराबाबत पोलिसांची नेमकी काय भूमिका आहे? आमदारावर कधी कारवाई होणार? असे अनेक प्रश्न अजूनही अनुत्तरीत आहे.म्हणूनच या प्रकरणाची न्यायिक चौकशी झाली तरच सर्व आरोपींना कठोर शिक्षा होवू शकेल. नाही तर सत्ताधाऱ्यांच्या दबावामुळे लवकरच हे सर्व आरोपी पुण्याच्या रस्त्यावर पुन्हा पैसा आणि राजकीय ताकद ची मस्ती दाखवण्यात मोकळे होतील”, असे ट्विट वडेट्टीवार यांनी केले आहे.
