मुसळधार पावसामुळे बंगळुरूत निर्माणाधीन इमारत कोसळल्याची घटना मंगळवारी घडली. या दुर्घटनेत तिघांचा मृत्यू झाला असून अन्य 17 जण ढिगाऱ्याखाली दबल्याची शक्यता वर्तवण्यात येत आहे. अन्य काही जण गंभीर जखमी झाल्याची माहिती मिळते.
तिघांचे मृतदेह ढिगाऱ्याखालून काढत शवविच्छेदनासाठी रुग्णालयात पाठवण्यात आले आहेत. जखमींना उपचारासाठी रुग्णालयात दाखल करण्यात आले आहे. ढिगाऱ्याखाली दबलेल्या लोकांना बाहेर काढण्यासाठी युद्धपातळीवर बचाव कार्य सुरू आहे.
बंगळुरूत अवकाळी पावसाने थैमान घातले आहे. पावसामुळे जनजीवन विस्कळीत झाले आहे. अनेक ठिकाणी पाणी साचले आहे. बऱ्याच ठिकाणी वीज खंडीत झाली आहे. शहरात सर्वत्र ट्रॅफिक जॅम झाल्याने वाहतूक व्यवस्था ठप्प झाली आहे. याशिवाय पावसामुळे अनेक दुर्घटनाही घडत आहेत.
