मुंबईसह देशातील अनेक शहरात भरमसाट वीज बिल ग्राहकांना येत आहे. त्यामुळे वीज बिल केंद्रात ग्राहकांच्या अक्षरशः रांगा लागलेल्या दिसतात. गुरुग्राममधील एका व्यक्तीला दोन महिन्याचे वीज बिल 45 हजार रुपये आले आहे. या वीज बिलाचा फोटो सोशल मीडियावर शेअर करत वीज ग्राहकाने आपल्या मनातील भावनांना वाट मोकळी करून दिली. जसवीर सिंग असे या व्यक्तीचे नाव आहे. त्यांनी दोन महिन्यांचे वीज बिल पेटीएमद्वारे भरले आहे. तसेच या वीज बिलावर तुम्ही 45,491 रुपये रक्कम पाहू शकता. त्यांनी ही पोस्ट शेअर करत लिहिले की, वीज बिल भरले आहे. किंमत पाहता आता मेणबत्त्यांचा वापर करण्याची गरज आहे, अशी कॅप्शन त्यांनी या पोस्टला दिली आहे, जी सध्या अनेकांना विचार करायला भाग पाडते आहे.
सोशल मीडियावर ही पोस्ट @jasveer10 या एक्स (ट्विटर) अकाऊंटवरून शेअर करण्यात आली आहे. ही पोस्ट पाहून युजर्स विविध गोष्टींवर चर्चा करताना दिसत आहेत. अनेक युजर्सनी वीज खर्चाबाबत स्वतःचे अनुभव शेअर केले, तर काही जणांनी जसवीर सिंग यांच्या वीज बिलामागील संभाव्य कारणांचा अंदाज लावला. तसेच कमेंट सेक्शनमध्ये विविध क्षेत्रांमधील विजेच्या विविध खर्चांवर आणि अनेकांना त्यांच्या उपयोगिता खर्चाचे व्यवस्थापन करताना येणाऱया आव्हानांवरही प्रकाश टाकला आहे.
