श्रीवर्धन येथील तरुणीला चिरडल्याची घटना ताजी असतानाच ठाण्यात सोमवारी भरधाव मर्सिडीजने दुचाकीला धडक दिल्याची घटना समोर आली आहे. अपघातात दुचाकीवरील जखमी तरुणाचा उपचारादरम्यान मृत्यू झाला. दर्शन हेगडे असे मयत तरुणाचे नाव आहे. याप्रकरणी नौपाडा पोलीस ठाण्यात अज्ञात वाहनधारकाविरोधात गुन्हा दाखल करण्यात आला आहे.
ठाण्यातील नीतिन कंपनी जंक्शनजवळ ही घटना घडली. घटनेनंतर वाहनचालक फरार झाला. पोलीस सीसीटीव्ही फुटेजच्या माध्यमातून आरोपीचा शोध घेत आहेत.
दर्शन रविवारी मध्यरात्रीच्या 1.50 वाजण्याच्या सुमारास खाद्यपदार्थ आणण्यासाठी दुचाकीने चालला होता. यादरम्यान नीतिन कंपनीजवळ मुंबईहून ठाण्याच्या दिशेने येणाऱ्या भरधाव मर्सिडीजने दर्शनच्या दुचाकीला जोरदार धडक दिली.
अपघातात दर्शन गंभीर जखमी झाला. त्याला तात्काळ उपचारासाठी खासगी रुग्णालयात नेण्यात आले. मात्र उपचारादरम्यान त्याचा मृत्यू झाला. आरोपीला अटक केल्याशिवाय मृतदेह ताब्यात न घेण्याचा पवित्रा दर्शनच्या कुटुबीयांनी घेतला होता. मात्र पोलिसांनी आरोपीच्या कुटुंबीयांना ताब्यात घेतल्यानंतर सोमवारी सायंकाळी दर्शनचा मृतदेह ताब्यात घेत कुटुंबीयांनी अंत्यसंस्कार केले.
