तेलुगू योद्धाजने अल्टिमेट खो-खो लीगमध्ये थरारक लढतीत ओडिशा जगरनॉट्सवर 29-28 असा एका गुणाने निसटता विजय मिळवला. रविवारी झालेल्या तेराव्या सामन्यात तेलुगू योद्धाज आणि ओडिशा जगरनॉट्स यांच्यात थरारक सामना पाहण्याचे भाग्य खो-खोप्रेमींना लाभले. गतविजेत्या ओडिशा जगरनॉट्सला मध्यंतराला मिळालेल्या एक गुणाची आघाडी कामी आली नाही. जगरनॉट्सने नाणेफेक जिंकून तेलुगू योद्धाजला आक्रमणासाठी आमंत्रित केले. पहिल्या टर्नमध्ये ओडिशा जगरनॉट्सच्या ओंकार सोनवणे, दीपेश मोरे आणि बी. निखिलने जोरदार संरक्षण करत ड्रीम रन्सचा 1 गुण मिळवून दिला. तर तेलुगू योद्धाजच्या रुद्र थोपटेने 6 गुण मिळवले. तर दुसऱया टर्नमध्ये तेलुगू योद्धाजकडून प्रतिक वाईकर, आदित्य गणपुलेनेही ड्रीम रन्सचे 4 गुण मिळवून देताना आपल्या संघासाठी अप्रतिम संरक्षणाचा खेळ केला. ओडिशाच्या गौतम एम. के. व दीपक साहूने चार-चार गुण मिळवून दिले.
