देशभरात खळबळ उडवून देणाऱया कर्नाटकातील सेक्स स्कँडलमधील मुख्य आरोपी जेडीएसचा खासदार प्रज्वल रेवण्णाची सध्या विशेष तपास समितीकडून चौकशी करण्यात य़ेत आहे. दरम्यान या चौकशीबाबत एक धक्कादायक माहिती समोर आली आहे. प्रज्वल रेवण्णा तपासात सहकार्य करत नसून तो उडवाउडवीची उत्तरं देत असल्याचे समोर आले आहे. प्रज्वल रेवण्णा हा त्याने काहीही केले नसल्याचे सांगत असून त्याला या प्रकरणात गोवले गेल्याचा दावा त्याने केला आहे.
हसनचा खासदार आणि एच. डी. देवेगौडा यांचा नातू असलेल्या प्रज्वलने जेडीएस-भाजप युतीचे उमेदवार म्हणून यंदाची निवडणूक लढवली आहे. मतदानानंतर प्रज्वलचे अनेक सेक्स स्कँडलचे व्हिडीओ व्हायरल झाले. त्यानंतर दुसऱयाच दिवशी तो देशातून परागंदा झाला होता. तो जर्मनीला निघून गेल्याचे कळल्यावर त्याच्या ठावठिकाण्यासाठी इंटरपोलमार्फत लुकआऊट नोटीसही जारी करण्यात आली होती. त्याचा अटकपूर्व जामीन अर्जही फेटाळण्यात आला होता.
31 मे रोजी प्रज्वल बंगळुरूत परतला. बंगुळूरूच्या केम्पेगौडा आंतरराष्ट्रीय विमानतळावरून अटक करण्यात आली. त्यानंतर त्याला न्यायालयात हजर करण्यात आले असता न्यायालयाने ६ जूनपर्यंत पोलीस कोठडी सुनावली.
