कोपरगावमध्ये सोमवारी सायंकाळी 5 वाजण्याच्या सुमारास धारणगाव रोड येथून जात असताना जुन्या भांडणाच्या कारणावरून शिवीगाळ करून लाथाबुक्यांनी मारहाण करून दहशत निर्माण केली. गावठी कट्टा दाखवत धमकावत तरुणाच्या गळयातील सोन्याची चैन लुटण्यात आली. ही लूटमार करणाऱ्या चौघांविरोधात कोपरगाव शहर पोलीस ठाण्यात गुन्हा दाखल करण्यात आला आहे. शहारूख रज्जाक शेख (रा. वार्ड न.२ श्रीरामपुर), तौफिक सत्तार (रा. वार्ड नंबर २ श्रीरामपुर), तन्वीर रंगरेज (रा. सुभाषनगर कोपरगाव), जान मंहमद मेमन (रा. वार्ड न. २ श्रीरामपुर) अशी पसार झालेल्या आरोपींची नावे आहेत.
गांधीनगर येथे राहणारा मजुरी करणारा तरुण नाजिम इस्लाउद्दीन शेख (वय 26) मजुरी करून कुटुंबाचा उदरनिर्वाह करतो. सोमवारी सायंकाळी 5 वाजण्याच्या सुमारास या रसत्याने जात होते. गजबजलेल्या धारणगाव रोड परिसरात विना नंबरच्या ईरटीगा गाडीतून आलेल्या चौघांनी त्याला अडविले. जुना वाद उकरून काढत त्यांनी शेख यांना शिवीगाळ करत लाथाबुक्यांनी मारहाण केली. परिसरात दहशत निर्माण करत शेख यांच्या गळयातील सोन्याची चैन बळजबरीने काढून घेत आरोपी शाहारुखने गावठी कट्ट्याचा धाक दाखवत ठार मारण्याची धमकी दिली. त्यानंतर आरोपी पसार झाले. याप्रकरणी नाजिम शेख यांनी दिलेल्या तक्रारीवरून कोपरगाव शहर पोलिसात या चौकटीविरुद्ध गुन्हा दाखल करण्यात आला आहे. शहर पोलीस निरीक्षक भगवान मथुरे यांच्या मार्गदर्शनाखाली पोसई संजय पवार हे पुढील तपास करीत आहेत.
