मराठा समाजाचे आंदोलन हे एका समाजाचे नसून कोरडवाहू शेतकऱ्यांच्या गरीब पोरांचे आंदोलन ठरते आहे. केंद्राने जास्त आरक्षण देण्याची अधिकार राज्याला द्यावेत. वारकरी संप्रदायाने सर्व जाती व समाजांना एकत्र आणले. मात्र आता राजकारणाच्या नावावर समाजांना व जातींना वेगळे केले जाणे दुर्दैवी आहे. राजकारणाचा सुवर्णकाळ महाराष्ट्राने अनुभवला असून सध्याचे चिखलफेकीचे राजकारण हे अशोभनीय आहे. असे रोखठोक प्रतिपादन ज्येष्ठ कवी माजी आमदार रामदास फुटाणे यांनी केले आहे
अमृतवाहिनी शिक्षण संस्थेच्या वतीने स्वर्गीय यशवंतराव चव्हाण यांच्या 39 व्या पुण्यतिथीनिमित्त आयोजित अभिवादन व प्रकट मुलाखत कार्यक्रमात ते बोलत होते. यावेळी व्यासपीठावर विधिमंडळ पक्षनेते आमदार बाळासाहेब थोरात, डॉ सुधीर तांबे, कवी प्रा. भरत दौंडकर आदींसह विविध पदाधिकारी उपस्थित होते.
फुटाणे म्हणाले की, महाराष्ट्राला सुसंस्कृत राजकारणाची परंपरा आहे. मात्र सध्या आरोप प्रत्यारोप आणि होणारी चिखलफेक अत्यंत वाईट आहे. आरक्षणाच्या नावावर तेढ निर्माण होत आहे. सध्या मराठा समाजाचे आंदोलन हे एका समाजाचे नसून कोरडवाहू शेतकऱ्यांच्या गरीब पोरांचे आंदोलन ठरते आहे. केंद्राने जास्त आरक्षण देण्याची अधिकार राज्याला द्यावेत. प्रत्येक समाजातील गरिबांना आरक्षण द्यावे. मात्र त्याला कालमर्यादा असावी. स्वर्गीय यशवंतराव चव्हाण, शरद पवार यांनी महाराष्ट्र उभा केला आहे. ज्यांनी काही काम केले नाही ते फक्त टीका करतात. जात ही मानवनिर्मित असून यावर परखड भाष्य करताना त्यांनी जात- जात नसते ही कविता सादर केली. तर सातव्या वेतन आयोगावर गाई मधील संवाद साधताना ते सातवा आयोग मागतात. तर आपण वाढीव चारा का मागू नये हे सांगताना सर्वांना खळखळून हसवले. कटपीस च्या कवितेला सर्वांनी भरभरून दाद दिली. तर भारतीय लोकशाही आणि संविधानावर सादर केलेल्या कवितेने प्रत्येकाच्या अंगावर शहर आणले. हलकेफुलके विनोद आणि जीवनातील अनुभव सांगताना ग्रामीण भागातील व्यथा मांडण्याचा आयुष्यभर कविता आणि चित्रपटाच्या माध्यमातून प्रयत्न केला असल्याचेही ते म्हणाले.
कार्यक्रमाचे प्रास्ताविक प्रा. केशवराव जाधव यांनी केले सूत्रसंचालन नामदेव कहांडळ यांनी केले. तर प्राचार्य विवेक धुमाळ यांनी आभार मानले यावेळी संगमनेर मधील साहित्यप्रेमी मोठ्या संख्येने उपस्थित होते.
