![nagar acident](https://www.saamana.com/wp-content/uploads/2024/07/nagar-acident-696x447.jpg)
रस्त्याच्या कडेला उभ्या असलेल्या पिकअपला भरधाव आयशर टेम्पोने धडक दिल्याने भीषण अपघाताची घटना घडली आहे. नगर सोलापूर महामार्गावरील कर्जत तालुक्यात मिरजगाव जवळील कोकणगाव बायपास जवळ हा अपघात घडला. या अपघातात जामखेड येथील तरुण पिकअप चालकाचा जागीच मृत्यू झाला आहे. महेश उर्फ (मयुर) भगवान मोरे असे मयत चालकाचे नाव आहे.
पोलिसांकडून मिळालेल्या माहितीनुसार, कर्जत तालुक्यातील कोकणगाव जवळील बायपासजवळ शनिवारी दुपारी दोन ते अडीच वाजण्याच्या सुमारास ही घटना घडली. पिकअप नगरहून मिरजगावच्या दिशेने जामखेडकडे येत होता. मात्र बायपासजवळ टायर पंक्चर झाल्याने चालकाने महामार्गाच्या बाजूला पिकअप थांबवला होता. चालक महेश पंक्चर झालेला टायर बदलत असताना समोरुन येणाऱ्या भरधाव आयशर टेम्पोने पिकअपला धडक दिली.
धडक इतकी जोरदार होती की पिकअप टेम्पो पलटी होऊन चालकाचा जागीच मृत्यू झाला. आयशर टेम्पोही अपघातानंतर पलटी झाला. घटनेची माहिती मिळताच मिरजगाव येथील सामाजिक कार्यकर्ते सोनू बागवान तसेच जीवन ज्योती रुग्णवाहिकेचे लहू बावडकर हे तातडीने घटनास्थळी दाखल झाले.
मिरजगाव पोलीस स्टेशनची संपर्क साधून घटनेची माहिती देण्यात आली. मिरजगाव पोलिसांनी घटनास्थळी दाखल होत पंचनामा केला. पिकअप चालकाचा मृतदेह ग्रामीण रुग्णालयात शवविच्छेदनासाठी पाठवण्यात आला.