मोखाडय़ातील पिंपळाचा पाडा येथील आठ वर्षांच्या बालिकेवर अत्याचार करून नंतर तिची हत्या केल्याची घटना 28 ऑक्टोबर रोजी घडली होती. या घटनेतील संशयितास मोखाडा पोलिसांनी अटक केली असून पुढील तपास सुरू आहे. मात्र या घटनेनंतर मोखाडावासीयांनी संताप व्यक्त करत आज नातेवाईकांसह ग्रामस्थांनी मोखाडा पोलीस ठाण्यावर मोर्चा काढला. नराधमाला फाशीची शिक्षा द्या, अशी मागणी या वेळी करण्यात आली.
मोखाडा शहरातील पिंपळाचा पाडा येथील 8 वर्षीय बालिका तेथीलच आपल्या मैत्रिणीच्या वाढदिवसाला गेली होती. मात्र उशिरापर्यंत ती घरी परतलीच नाही. त्यामुळे तिच्या पालक व नातेकाईकांनी शोधाशोध केली असता रात्री उशिरा कब्रस्ताननजीक सापडली होती. मोखाडा ग्रामीण रुग्णालयात तिला तपासणीसाठी नेले असता तेथील वैद्यकीय अधिकाऱयांनी तिला मृत घोषित केले होते. या बालिकेवर अत्याचार करून नराधमाने तिला ठार मारले होते. या घटनेमुळे नागरिक संतप्त झाले आहेत.
