डोंबिवली येथील एमआयडीसी स्फोट प्रकरणी मालती मेहता यांना नाशिक पोलिसांनी ताब्यात घेतलं आहे. मालती मेहता या डोंबिवली एमआयडीसीमधल्या अमुदान कंपनीच्या मालक आहेत. नाशिकच्या मेहेरधाम परिसरातून पोलिसांनी त्यांना ताब्यात घेतलं आहे. मालती आणि मलय मेहता यांच्यावर सदोष मनुष्यवधाचा गुन्हा दाखल करण्यात आला आहे.
गुरुवारी अनुदान या कंपनीत झालेल्या स्फोटात 11 जणांचा मृत्यू झाला. या कंपनीची मालकी मालती मेहता यांच्याकडे आहे. स्फोटानंतर मालती आणि मलय फरार झाले होते. हे दोघंही नाशिकमध्ये असल्याची माहिती पोलिसांना मिळाली होती. त्यानुसार गुरुवारी रात्रीपासून नाशिक गुन्हे शाखा आणि ठाणे गुन्हे शाखेच्या पोलिसांनी संयुक्तरित्या कारवाईची मोहीम हाती घेतली होती.
